انا لسه بيطلعلى حبوب لكن كنت بلاحظ انها بتطلع فى اماكن معينه وهى ال Chin وال Forehead
نادرا ما تطلع فى خدودى
من يومين طلعالى حبايه غلسه كبيرة جدا وعماله تكبر فى خدى اليمين بصراحه حبيت اعرف تفسير ليها
ليه الحبوب بتطلع فى اماكن معينه وهل دا ليه معنى بتحاول بشرتك تقولهولك!!
وبعد البحث كالعاده فى مواقع طبيه وصلت لتفسير جميل اوى وانا معتبراه لعبه لانك بعد كدا هتبقى فاهمه بشرتك ولما تشوفى حبايه مش هتنزعجى منها بالعكس هتبقى فاهمه سببها ايه وهتصلحيه
زى ما حصل معايا واكتشف سبب الحبايه اللى فى خدى الشمال ودلوقتى انا مش مضيقه منها لانى عرفت سببها
عايزاكو تركزوا فى الصورة
الصورة دى فيها خريطه الوجه ودى طريقة لتحليل الجلد طبقا لدراسات صينيه
دلوقتى هنعرف الحبوب - الهالات السوداء - البقع فى وجهك بتحاول تقولك ايه
zone 1&3
بتمثل منطقة المثانه والجهاز الهضمى لو دايما يطلعلك حبوب فى المنطقه دى يبقى بشرتك عايزة تقولك اشربى كمية من الماء اكتر وحسنى الدايت بتاعك
zone 2
المنطقه بين الحاجبين تمثل الكبد بشرتك عايزة تقولك بطلى شرب خمرة يا اختى منك ليها
ههههههههههههههههه دا بجد على فكرة بس للى بيشربوا
احنا عشان مش بنشرب فهتلاقى السبب انك عماله تاكلى وجبات تقيله على الكبد او ادويه معينه او حاجة عملالك حساسيه او نومك متبهدل ومتقطع
zone 4 & 10
الاذنين اكتر منطقه حساسه للكليه فحضرتك لو لاحظتى انه ودانك دايما سخنه اوى ومحمرة يبقى انتبهى فيه مشكله فى الكليه محتاجه تزودى كمية الماء اللى بتشربيها يوميا ووقفى الكافيين شاى قهوة نسكافيه
zone 5 & 9
الخدود بتنبهك انه فيه مشكله فى الجهاز التنفسى
يعنى لو بتدخنى وقفى العادة دى نهائى
لو عندك حساسيه او برد شديد هتطلعلك حبوب فى خدودك
ودا يا بنات تفسير الحبايه الغلسه اللى طلعت فى خدى لانى الاسبوع اللى فات كان عندى برد جامد اوى
zone 6 & 8
منطقة حول العين بتتأثر بالجفاف دايما (الكليه ) يعنى لو بتشربى مايه قليله هيطلعلك هالات سوداء لكن طبعا فيه اسباب تانيه كتير للهالات
zone 7
الانف ليها علاقه بالقلب لو لقيتى انفك حمرا ومتكونش دى طبيعتك ولا تكونى مستخدمه ميك اب او كريم معين عملك حساسيه دا ممكن يكون معناه انه ضغطك عالى
zone 12
ذقنك بيشاورلك على معدتك لو بيطلعلك حبوب فى دقنك كتير يبقى انتى محتاجه تاكلى الياف كتير وخضرة وفاكهه وزبادى عشان تحسنى الهضم
zone 11 &13
ليها علاقه بالهرمونااات
zone 14
المرض بوجه عام ممكن بكون جسمك بيحاول بحارب بكتريا او حاجة زى كدا
ودى شوية نصايح معظمكو عارفينها بس مش هتخسرى حاجة انك تقريها تانى
•الكبد بيكون فى اقوى حالاته من ١ ل ٣ بالليل الوقت دا لازم تكونى نايمه فيه
•تنامى بدرى١٠ وتصحى بدرى ٦ الصبح ولازم يكون نوم منتظم
•الرئتين بتكون فى اقوى حالاتها من الساعه ٧ ل ٩ صباحا ودا افضل وقت لعمل التمارين الرياضيه
•تمارين رياضيه خفيفه ٢٠ دقيقه يوميا
•اهتمى بنضافة شعرك والطرحه بتاعتك
•احرصى دايما على غسل ايديكى بغسول معقم
•قللى من الاكل السبايسى ويكون معتدل ولا سخن اوى ولا بارد اوى
•قللى اكل الدهون والسكريات
•امنعى عادة الاكل قبل النوم
•اهتمى بالالياف والخضار والفواكه
•اشربى مايه كتير
كدا انا خلصت اى سؤال انا موجودة
ومش محتاجه افكرك لو استفدتى قيمي الموضوع عشان غيرك تستفاد